Opus 464/ 1996
Gut, dass Gedankenlesen keine sehr verbreitete Kunst ist, denn manchem
würde das aufgesetzte Lächeln einfrieren. Nachfolgende Kommentare habe ich
aufgeschnappt und nur ein wenig „dramaturgisch“auf Reihe gebracht.
Mei liaba Geschäftsfreind,
i hob damit ned di gmoint,
i dua dia nix,
dua du mia nix!
I kann di zwar goa ned leidn,
jeda sogt, du bist a Schwein,
owa doa dua i dia nix,
dua mia aa nix, dua mia nix!
„Jeda hod sei Leich im Kella“,
„d Saejn han dunkla oda hella“,
„koana is vo uns a Engl“,
„mia sand oizamm kloane Bengl!“
Mei liaba Parteifreind,
i hob damit ned di gmoint,
i dua dia nix,
dua du mia nix!
Mei, du ghearadst hinta Gitta,
denn du bist ein Raubritta,
eigentle bin i empöat,
doch im Schtilln, dass neamad head.
So ein Gauna, ein gemeiner,
is ein Freund von unsereiner,
i hoff, dass das niamois gschpannst,
wos du mich oissen kannst!
Mei liaba Voreinsfreund,
i hob damit ned di gmoint,
i dua dia nix,
dua du mia nix!
Kokettiera, Unruahschüara!
Du bist oana vo ganz friahra,
du bist gschead und grob und bled,
mia wiad schlecht, wenne di sehg!
Ach, du bist ein Pharisäa,
jedn Tog trogst d Nosn heha,
geh, und Schmaaz ned goa so gschwoin!
So ebbs kann ma nia ned gfoin!
Mei liaba Geschäftsfreund,
i hob damit ned di gmoint,
i dua dia nix,
dua du mia nix!
Ach, es is die oite Leia,
mit Hean Kunz und mit Hean Meia,
mit Frau Huaba, mit Frau Schmitz,
doama uns nix, doama uns nix!
Wenne dia gib an kloan Renna,
dann rupfst du mia meine Hehna,
wenne di gengs Schienboa hau,
hetzt du mia dei waejde Sau!
Wenne di bring in die Zeitung,
zfetzt ma du meine scheenste Kleidung,
wenne di aa weng voschpott,
dann mochst du aus mia Kompott!
Mei liaba Geschäftsfreund,
i hob damit ned di gmoint,
i dua dia nix,
dua du mia nix!